Mikil skelfing greip um sig á meðal íbúa Lundúna í morgun eftir að tveggja hæða strætisvagn var sprengdur í loft upp á brú í borginni. Ekki var þó um hryðjuverk að ræða heldur upptöku kvikmyndar.

Það var snemma í morgun sem íbúar og vegfarendur sáu strætisvagninn aka eftir Lambeth-brúnni í Lundúnum. Skyndilega varð mikil sprenging og héldu margir að um hryðjuverkaárás væri að ræða.

Það var þó ekki raunin. Verið var að taka upp atriði í kvikmyndinni The Foreigner, með Jackie Chan í aðalhlutverki. Búið var að loka fyrir umferð á brúnni á meðan tökur fóru fram og að sögn framleiðenda var búið gefa út viðvörun.

Sú viðvörun náði þó ekki til allra og því urðu ansi margir hræddir þegar þeir sáu sprenginguna. Samfélagsmiðlar á borð við Twitter og Facebook loguðu í kjölfar sprengingarinnar þar sem óttast væri að hryðjuverkaárás hefði átt sér stað.

„Var nógu langt í burtu til að sjá strætó sprengdan í loft upp á Lambeth-brúnni. Veit ekki hvað gerðist, er með sting í maganum,“ sagði einn á Twitter sem varð vitni af sprengingunni.

Málið vakti ekki aðeins mikinn ótta heldur einnig reiði þar sem margir sögðu sprenginguna minna á hryðjuverkaárásirnar í Lundúnum 7. júlí árið 2005, þar sem 52 létu lífið þegar að hryðjuverkamenn gerðu árásir á lestarstöðvar í borginni.

Þar var svo slökkviliðið í Lundúnum sem tilkynnti á samfélagsmiðlum, skömmu eftir að orðrómur um hryðjuverk komst á kreik, að um atriði í kvikmynd hafi verið að ræða en ekki hryðjuverk.

„Hey kvikmyndamenn, næst þegar þið sprengið strætó á Lambeth-brúnni getið þið þá látið okkur vita fyrir fram svo að börn tryllist ekki af hræðslu,“ sagði einn eftir að búið var að leiðrétta misskilninginn.

Áætlað er að kvikmyndin The Foreigner verði frumsýnd síðar á þessu ári.

Hér má sjá myndband af sprengingunni.