Edda Björk Arnardóttir, sem flaug með einkaflugvél með þrjá syni sína til Íslands frá Noregi í marsmánuði árið 2022, verður framseld til Noregs, ef marka má tilkynningu frá bróður hennar, sem birtist á Facebook-síðu Eddu Bjarkar í kvöld.
Segir hann:
„Núna seint í kvöld var tekin ákvörðun um að senda systur mína, Eddu Björk Arnardóttur, út, það var gert rétt fyrir kl 22 og því ekki möguleiki fyrir hana að bregðast við.
Þetta er gert þrátt fyrir það að framsal hafi verið kært til landsréttar og að dómur þaðan sé ekki kominn!
Það á að læða íslenskum ríkisborgara úr landi.“
Barnsfaðir Eddu Bjarkar fer með forræði sonanna þriggja. Norskir og íslenskir dómstólar hafa úrskurðað að Eddu beri að afhenda synina föður þeirra í Noregi. Norsk yfirvöld hafa ennfremur ákært Eddu Björk fyrir brottnám drengjanna. Hennar virðast núna bíða réttarhöld í Noregi.
Samkvæmt skrifum vina og ættingja Eddu Bjarkar á Facebook-síðu hennar hefur héraðsdómur úrskurðað um framsal hennar til Noregs en málið hefur ekki komið til kasta Landsréttar. Engu að síður á að senda Eddu úr landi í nótt, samkvæmt ummælum vina og ættingja.
