Vísir greinir frá þessu en Mannlíf greindi fyrst frá því í gær að þrír læknanemar hafi rætt sjúkrasögu nafngreindra einstaklinga sín á milli í heitum potti á höfuðborgarsvæðinu um helgina. Var einn nemandinn sagður hafa lýst samskiptum sínum við nafngreinda eldri konu á niðrandi hátt og þá hafi þeir rætt um ónafngreinda sjúklinga. Er fullyrt að mörg vitni hafi verið að samræðunum sem stóðu yfir í um fimmtán mínútur.
Mannlíf hafði eftir Þórarni Guðjónssyni, forseta læknadeildar HÍ, að málið væri tekið mjög alvarlega. Benti hann á að nemendurnir skrifuðu undir þagnarskyldu strax á fyrsta ári sem svo er ítrekuð reglulega til þeirra.
Kvaðst hann vonast til þess að læknanemarnir myndu gefa sig fram en efaðist um að þeir myndu gera það. Sagðist hann ætla að ræða málið við forstjóra Landspítalans líka.
Í frétt Vísis í morgun ítrekar Þórarinn að málið sé litið alvarlegum augum en í raun hafi hann það bara eftir blaðamanni Mannlífs hvað átti sér stað og sá virðist sjálfur hafa verið í heita pottinum. Erfitt sé að komast að því hvaða læknanema um ræðir og ekki sé einu sinni víst að þeir stundi nám sitt við Háskóla Íslands.
