Sky News skýrir frá þessu og segir að Wright hafi búið nærri heimili stúlkunnar í Albion í Michigan árið 1988. Þá var stúlkan beitt kynferðisofbeldi og var Wright fundinn sekur um það. Lögreglumaður, sem var á frívakt, sagðist hafa séð til ferða hans um fimm klukkustundum áður en stúlkan var beitt kynferðisofbeldi. Maður braust inn á heimili hennar, þegar hún var sofandi, og neyddi hana til að fara inn í stofuna þar sem hann braut síðan á henni.
Síðar þennan sama dag gaf Wright sig fram við lögregluna. Segja lögreglumenn að hann hafi þá játað að hafa brotið á stúlkunni en yfirheyrslan yfir honum var ekki tekin upp og hann skrifaði ekki undir játningu að sögn talsmanna Cooley Law Schoold Innocence Project, sem fer með mál hans. Stúlkan var aldrei beðin um að taka þátt í sakbendingu eða bera kennsl á árásarmanninn í dómsal.
Wright mótmælti ákærunni ekki en í Michigan er það metið til jafns við játningu þegar kemur að ákvörðun refsingar. Hann reyndi síðar að draga játningu sína til baka og lýsti yfir sakleysi sínu.
Á meðan hann sat í fangelsi hélt hann alltaf fram sakleysi sínu. Ekki er vitað af hverju hann mótmælti ekki ákærunni í upphafi.
Hann var dæmdur í 25 til 50 ára fangelsi fyrir kynferðisbrot og 6 til 15 ára fangelsi fyrir innbrot.
Fyrr á árinu fundust munir tengdir málinu og voru þeir sendir í rannsókn. Niðurstaðan var að á þeim var DNA úr „útlendum karlmanni“. Þá lá ljóst fyrir að Wright væri saklaus og lagði saksóknari til að hann yrði sýknaður af ákærunni og var fallist á það.
Wright á rétt á allt að 1,7 milljónum dollara í bætur fyrir að hafa setið saklaus í fangelsi í 35 ár, eða 50.000 dollara fyrir hvert ár.
