Johnson var lítt þekktur þegar hann var kjörinn forseti fulltrúadeildarinnar og margir samflokksmenn hans urðu að nýta sér þjónustu Google til að afla sér upplýsinga um hann. Við þessa leit rákust margir á myndband frá 2022 þar sem Johnson tók þátt í pallborðsumræðum um hættuna, sem stafar af nútímatækni, í baptistakirkju í Louisiana, sem er heimaríki hans.
Þegar rætt var um hvernig sé hægt að bregðast við mörgum af þeim hættum og freistingum sem eru á Internetinu sagðist hann hafa hlaðið appinu Covenant Eyes niður í snjallsíma sinn og fartölvu.
Eftir því sem segir á heimasíðu Covenant Eyes þá er þetta forrit „sem hjálpar þér að lifa klámlausu lífi“.
Forritið skráir netnotkunina með því að taka skjáskot af skjánum á hverri mínútu. Það notar síðan gervigreind til að skanna skjáskotin í leit að nektarmyndum eða orðum af kynferðislegum toga.
Appið sendir síðan skýrslu vikulega til svokallaðs „ábyrgðarfélaga“ sem getur þannig fylgst með öllu sem hinn gerði á netinu. „Ábyrgðarfélagi minn er Jack, sonur minn. Hann er 17 ára. Hann og ég fáum skýrslu um allt sem er í símunum okkar, já öllum tækjunum okkar,“ sagði Johnson.
Áskrift að Covenant Eyes kostar 17 dollara á mánuði og er hægt að tengja allt að 10 notendur saman. Appið er mjög vinsælt, sérstaklega hjá kristnum fjölskyldum, söfnuðum og fólki sem er að reyna að brjótast út úr vítahring klámfíknar.
Margir hafa gagnrýnt þessa uppeldisaðferð Johnson og sagði spjallþáttastjórnandinn Jimmy Kimmel til dæmis: „Það er einnig hægt að vera of nálægt börnunum sínum.“
Tölvusérfræðingar hafa einnig lýst yfir áhyggjum af að Johnson notist við app sem fylgist með hegðun fólks og safni miklu magni upplýsinga.
