Lagabreytingar sem áttu sér stað í Suður Kóreu árið 2014 urðu tilefni umfangsmikilla mótmæla og verkfalls kennara nú í haust. Kennarar mótmæltu stanslaust í níu vikur og náðu þannig að knýja fram mikilvægar úrbætur á löggjöfinni.
Málið varðaði lagaákvæði sem ætlað var að vernda hagsmuni barna gagnvart kennurum. Samkvæmt þessu umdeilda ákvæði bar að víkja kennara fortakslaust úr starfi í kjölfar ásakana um ofbeldi eða misneytingu í garðs nemanda. Ekki sá löggjafinn þó fyrir hvernig ákvæðinu yrði beitt í framkvæmd. Nú í september greindu kennarar frá því að þeim hafi verið vísað úr starfi fyrir minnstu sakir og mátu sæta stöðugum hótunum af hendi foreldra nemenda sinna. Kennarar hafi verið sakaðir um ofbeldi gegn nemendum ef þeir fóru ekki að vilja foreldra og misstu við það starf sitt. Jafnvel voru kennarar tilkynntir fyrir það eitt að reyna að hemja börn í bræðisköstum, eða fyrir að veita þeim tiltal.
Foreldrar væru að misnota löggjöfina. Staðan náði suðupunkti eftir að 23 ára grunnskólakennari svipti sig lífi í kjölfar kvartana frá foreldrum. Kennarar risu þá upp og sögðu að upp væri komið landslag í skólakerfinu þar sem kennurum væri ókleift að kenna eða aga nemendur sína sökum tilefnislausra ásakana.
Það var loks í september sem löggjafinn brást við ákalli kennara og breytti löggjöfinni á þann veg að kennurum er ekki lengur fortakslaust vísað úr starfi í kjölfar ásakana. Þess í stað verður hvert mál rannsakað gaumgæfilega og þurfa sannanir að vera fyrir hendi. Eins voru sett stjórnvaldsfyrirmæli sem heimila kennurum að vísa nemendum úr kennslustundum sem eru að trufla og eins er kennurum heimilt að hafa hemil á nemendum þegar þörf krefur.
Sumir kennarar telja þó að lagabreyting dugi ekki til. Vissulega sé hér um að ræða skref í rétta átt, en lengra þurfi að ganga. Barnaverndarlöggjöf megi ekki verða til þess að agaviðurlög í skólum séu flokkuð sem ofbeldi gegn barni. Eins þurfi kennarar að hafa úrræði þegar þeir eru bornir röngum sökum, og löggjafinn þurfi að tryggja að hægt sé að draga foreldra sem slíkar ásakanir leggja fram, til ábyrgðar. Möguleg refsiábyrgð foreldra sé það eina sem komi í veg fyrir falskar ásakanir.
Sagt er að það megi kenna menningunni í Suður Kóreu um þessa stöðu. Samkeppni er gífurleg í skólakerfinu og á vinnumarkaði sem verði til þess að foreldrar kappkosti öllu til að börn þeirra fái sem bestar einkunnir, því annars komast þau ekki í bestu háskólana.
