Rauðir eldmaurar hafa náð að hreiðra um sig á Ítalíu og það eru slæm tíðindi fyrir Evrópu. Þetta er ágeng tegund sem gæti dreift sér hratt um álfuna og jafnvel til Bretlandseyja. Það er hnattræn hlýnun sem gerir henni kleift að ná fótfestu í Evrópu.

Rauðir eldmaurar, Solenopsis invicta, geta eyðilagt uppskeru, stungur þeirra eru öflugar og þeir fara oft inn í raftæki, þar á meðal bíla og tölvur.

Þessi tegund er talin ein mest eyðileggjandi ágenga tegundin. Hún getur mjög hratt myndað „ofurbú“ með mörgum drottningum. Maurarnir lifa á hryggleysingjum, stórum hryggdýrum og plöntum. Þeir eyðileggja plöntur og hafa betur gegn öðrum maurategundum í baráttunni um mat.

Rauðir eldmaurar eru í fimmta sæti yfir þær ágengu tegundir sem valda mestum skaða. Þeir berast með vörum á milli heimsálfa. Þeir eru upprunnir í Suður-Ameríku og bárust þaðan til Mexíkó, Karíbahafsins, Ástralíu og Bandaríkjanna þar sem tjón af þeirra völdum er metið á um 6 milljarða dollara á ári.

Vísindamenn fundu 88 bú rauðra eldmaura á 5 hektara svæði nærri Syracuse á Sikiley. Samkvæmt niðurstöðum erfðafræðirannsóknar, sem hefur verið birt í Current Biology, þá eru þessir maurar líklega frá Kína eða Bandaríkjunum.