Mikið er rætt um klasa og klasastarfsemi í ýmsum atvinnugreinum þessi misserin. Þekktasti klasinn hér á landi er án efa Sjávarklasinn, sem starfað hefur í rúman áratug. En hvað þýðir þetta hugtak, klasi? Þór Sigfússon, stofnandi og stjórnarformaður Sjávarklasans, er viðmælandi Ólafs Arnarsonar í hlaðvarpi Markaðarins að þessu sinni.

Markaðurinn - Þór Sigfússon - Sjávarklasinn

„Klasi snýst um að reyna að kortleggja alla mögulega starfsemi í tilteknum greinum og líta á sem eitt samfélag sem þurfi að tengja og finna þær tengingar,“ segir Þór.

Hann segir ríka tilhneigingu til þess að fyrirtæki hugsi fyrst og fremst um sig og eigi svo samvinnu sín í milli um samskipti við ríkisvaldið. „Við bendum á að samskiptin milli fyrirtækja eru ekki síður mikilvæg.

Hann rifjar upp með bros á vör þegar stjórnandi fyrirtækis í sjávarútvegi kom til hans fyrir nokkrum árum, þegar komin var nokkur reynsla á starfsemi Sjávarklasans, og sagði við hann: „Ég hafði ekki hugmynd um að það væri verið að vinna svona mikið úr mínum afurðum.“

Þór segir reynslu þessa manns vera mjög gott dæmi um það að hrat frá einu fyrirtæki getur verið gersemi annars.