Þann 15. september næstkomandi verður aðalmeðferð fyrir Héraðsdómi Suðurlands í máli sem héraðssaksóknari hefur höfðað á hendur þeim Stefáni Ólasyni og Svanbjörgu Vilbergsdóttur fyrir meiriháttar skattalagabrot í rekstri einkahlutafélagsins LF system ehf.

Félagið var stofnað árið 2016 og sinnti rekstri hótela- og gistiheimila með veitingaþjónustu. Félagið varð gjaldþrota árið 2019.

Í ákæru héraðssaksóknara segir að Stefán hafi verið framkvæmdastjóri félagsins og Svanbjörg stjórnarmaður, prókúruhafi og daglegur stjórnandi. Þeim er gefið að sök að hafa ekki staðið skil á virðisaukaskatti fyrir rekstrarárin 2017, 2018 og 2019 fyrir samtals rúmlega 31 milljón króna.

Ennfremur eru þau sökuð um að hafa ekki staðið skil á staðgreiðslu opinberra gjalda fyrir sömu tímabil sem nemur rúmlega 21 milljón króna.

Þess er krafist að þau Stefán og Svanbjörg verði dæmd til refsingar og greiðslu alls sakarkostnaðar. Miðað við dómafordæmi mega þau eiga von á mjög hárri sekt verði þau fundin sek, sem gæti numið tugum milljóna.