Þann 25. júlí síðastliðinn vann Ólöf Finnsdóttir, fyrrverandi framkvæmdastjóri Dómstólasýslunnar, mál gegn Bílabúð Benna, fyrir Héraðsdómi Reykjavíkur. Gekk dómstóllinn að fullu að kröfum Ólafar sem snúast um endurgreiðslu á tryggingaiðgjöldum, bifreiðagjöldum og öðrum lögbundnum gjöldum af bílnum sem hún þurfti að standa straum af eftir að kaupum á bílnum hafði verið rift. Bíllinn sem um ræðir er forláta Porsche Cayenne að verðmæti 14 milljónir króna.

Ólöf hafði þegar lagt bílabúðina í máli þar sem krafist var riftunar á kaupunum, bæði fyrir héraðsdómi og Landsrétti, auk þess sem Hæstiréttur hafnaði beiðni bílabúðarinnar um að taka málið fyrir. Málið snerist um einkennnilegan galla sem olli þrálátri ólykt í bílnum.

Sjá einnig: Illa þefjandi Porsche í eigu fyrrverandi framkvæmdastjóra dómstólasýslunnar – Ólöf Finnsdóttir stefndi Bílabúð Benna sem áfrýjaði

Ólyktin gaus upp í bílnum vegna mikillar vatnssöfnunar og tókst bílabúðinni ekki að ráða bót á þessu vandamáli. Sagði í dómi héraðsdóms að bílabúðin hefði fengið fjögur tækifæri til að bæta úr gallanum en það ekki verið gert. Bílabúðin taldi gallann vera óverulegan og samþykkti ekki að rifta kaupunum. Þess vegna fór málið fyrir dóm. Bílabúðin undi síðan ekki niðurstöðu héraðsdóms og áfrýjaði til Landsréttar, sem staðfesti niðurstöðu Héraðsdóms.

Ólöf fullkomnaði síðan sigur sinn yfir bílabúðinni er Héraðsdómur Reykjavíkur dæmdi bílabúðina til endurgreiða Ólöfu 691.000 krónur sem hún hafði lagt út fyrir í lögbundin gjöld af bílnum eftir að kaupunum hafði verið rift.

Dóminn má lesa hér.