Þann 31. júlí síðastliðinn voru tvær konur sakfelldar í Héraðsdómi Reykjaness fyrir að hafa flutt mikið magn af kókaíni saman til Íslands með flugi frá ótilgreindu landi til Keflavíkurflugvallar.
Um var að ræða rúmlega 1,6 kg af kókaíni með styrkleika upp á 67-69%. Konurnar földu fíkniefnin í 137 pakkningum í hjólastól sem önnur konan sat í og hin keyrði.
Þær játuðu báðar brotið fyrir dómi og var það virt þeim til refsilækkunar. „Á hinn bóginn ber að horfa til þess að þær fluttu umtalsvert magn af hættulegu fíkniefni til landsins, falin í hjólastól, og voru efnin ætluð til söludreifingar hér á landi og um samverknað er að ræða,“ segir hins vegar í dómnum.
Var hvor um sig dæmd í 18 mánaða fangelsi. Konurnar hafa báðar setið í Fangelsinu Hólmsheiði í gæsluvarðhaldi síðan 1. júní og dregst sá tími frá refsingunni.
Dóminn má lesa hér.
