Það er háalvarlegt mál ef til þess kemur að það gjósi í Torfajökulsöskju en skjálftahrina hófst í norðanverðri öskjunni á sunnudaginn og mældist stærsti skjálftinn 3,2.

Í umfjöllun Morgunblaðsins um málið er haft eftir Þorvaldi Þórðarsyni, eldfjallafræðingi, að það sé háalvarlegt mál ef það gýs í öskjunni.

Síðast gaus í Torfajökli 1477 og mynduðust Laugahraun og Námshraun þá.

Þorvaldur benti á að oft hafi gosið í eldstöðinni á síðustu árþúsundum og hafi mörg gosanna verið stór. „Þetta hefur verið öflugt sprengigos og það var alveg jafn öflugt og gosið í Öskju 1875,” sagði hann um gosið árið 871 í Torfajökli en þá myndaðist Hrafntinnuhraun.

Öskjugosið 1875 var ekkert smáræði, þriðja mesta sprengigosið hér á landi á sögulegum tíma. Megingosið stóð þó aðeins yfir í nokkrar klukkustundir.

Þorvaldur sagði að ef það gýs í öskjunni þá geti orðið gjóskufall um allt land ef gosið er stórt.

Hægt er að lesa nánar um málið í Morgunblaðinu.