Íslenska hamborgarafabrikkan hefur lokað veitingastað sínum í Kringlunni í dag í ljósi orðróms um að allt að átján gestir veitingastaðarins hafi orðið veikir eftir að hafa borðað þar nýlega. „Við tökum frásögnum mjög alvarlega og viljum með þessu tryggja að það sé ekkert upp á okkur að klaga,“ segir María Rún Hafliðadóttir, forstjóri Gleðipinna, en félagið á og rekur Íslensku Hamborgarafabrikkuna.

Upphaf málsins má rekja til færslu í Facebook-grúbbunni Matartips þar sem notandi einn greindi frá því að hún hefði heimsótt Fabrikkuna í Kringlunni um nýliðna helgi. Hún hafi pantað sér Morthens-borgarann en orðið svo veik í kjölfarið ásamt þeim sem pöntuðu sama borgara við borðið, aðrir hafi sloppið. Hún hafi haft samband við veitingastaðinn daginn eftir og þá verið tjáð að starfsfólk hafi farið heim með ælupest og best væri að senda tölvupóst á fyrirtækið. Eftir að hafa beðið árangurlaust eftir svari hafi hún sett inn færslu á Matartips og þá hafi komið í ljós að fleiri höfðu svipaða sögu að segja.

María Rún brást við með því að svara færslunni og segja að ákveðið ferli fari í gang hjá fyrirtækinu þegar grunur sé um mögulega matareitrun. Í samtali við DV segir María Rún að útibúinu hafi verið lokað í dag og að verið sé að þrífa staðinn hátt og lágt og sótthreinsa. Unnið hafi verið í nánu samstarfi við Heilbrigðiseftirlitið, vörur hafi verið sendar í greiningu og unnið sé með birgjum í að skoða hvort og þá hvað hafi farið úrskeiðis.

„Við viljum tryggja að það sé allt með felldu hjá okkur og velta við öllum steinum,“ segir María Rún. Hún segir að ekkert þessu líkt hafi gerst í tólf ára sögu Hamborgarafabrikkunnar.

María Rún segir að enginn grunur sé um hvað gæti hafa valdið þessu, en sósur og til að mynda eggjarauður verði skoðaðar sérstaklega. Hún segist gera ráð fyrir því að Fabrikkan í Kringlunni verði opnuð aftur á morgun.