Birna Einarsdóttir bankastjóri Íslandsbanka hefur ákveðið að láta af störfum sem bankastjóri eftir að bankinn þurfti að greiða 1,2 milljarða króna sekt vegna brota á reglum og lagaákvæðum í tengslum við sölu á um fjórðungshlut ríkisins í bankanum í mars í fyrra. Jón Guðni Ómarsson tekur við sem bankastjóri.

Í yfirlýsingu kemur fram að Birni hafi ákveðið að stíga til hliðar „með hagsmuni bankans að leiðarljósi svo ró geti myndast vegna sáttar Íslandsbanka við fjármálaeftirlit Seðlabanka Íslands.“

Með því segist Birna axla ábyrgð á sínum þætti málsins. Hún segir að umræðan hafi verið óvægin undanfarna daga og ýmsum stjórnmálamönnum verið tíðrætt um afsögn hennar en hún óskar þeim velfarnaðar í þeirra störfum.

Jón Guðni hef­ur starfað hjá Íslands­banka og for­ver­um hans frá ár­inu 2000 og gegnt starfi fram­kvæmda­stjóra fjár­mála bank­ans frá 2011. Hann mun áfram gegna stöðu fram­kvæmda­stjóra fjár­mála þar til ráðið hef­ur verið í þá stöðu.

„Fyr­ir hönd stjórn­ar vil ég þakka Birnu Ein­ars­dótt­ur fyr­ir mörg far­sæl ár í starfi hjá bank­an­um. Birna hef­ur byggt upp sterk­an banka og öfl­uga liðsheild sem við mun­um áfram búa að. Hún hef­ur að sönnu verið hreyfiafl og haldið gild­um um jafn­rétti, fjöl­breyti­leika og sjálf­bærni á lofti inn­an sem utan fyr­ir­tæk­is­ins. Við ósk­um Birnu velfarnaðar í framtíðinni,“ er haft eft­ir Finni Árna­syni, stjórn­ar­for­manni Íslands­banka.

„Stjórn bank­ans þekk­ir vel til starfa Jóns Guðna sem hef­ur yf­ir­grips­mikla reynslu af störf­um á fjár­mála­markaði og mun leiða bank­ann á þeirri veg­ferð sem framund­an er.“