Shahzada Dawood, einn ríkasti maður Pakistan, er um borð í kafbátnum Titan, sem nú er týndur í miðju Atlantshafi, ásamt nítján ára syni sínum Sulaiman Dawood.

Eins og greint var frá í gær var kafbátnum ætlað að kafa niður að hinu goðsagnarkennda flaki Titanic þegar sambandið við leiðangursskipið, The Polar Prince, rofnaði.

Um borð eru fimm einstaklingar, tveir starfsmenn og síðan þrír ferðamenn, sem ólmir vildu berja flakið goðsagnarkennda augum. Auk Dawood feðganna er milljarðamæringurinn Hamish Harding, stjórnarformaður Action Aviation í Dubai. Sá er mikill ævintýramaður og er meðal annars handhafi heimsmets um þann einstakling sem hefur náð að kafa niður á mesta dýpið.

Einnig um borð er hinn 73 ára gamli Paul-Henry Nargeolet, sem er franskur landkönnuður auk þess sem talið er að Stockton Rush, framkvæmdastjóra fyrirtækisins OceanGate, sem gerir út ferðirnar, sé um borð.

Um var að ræða aðeins þriðju ferð fyrirtækisins að Titanic-flakinu og sú eina sem var ráðgerð í ár. Tvær slíkar eru á dagskrá á næsta ári.

Ferðirnar  eru aðeins á færi útvaldra. Þannig kostar túrinn tæpar 35 milljónir króna á mann, eða 250 þúsund dollara, en alls varir hann í tíu daga. Inni í því verði er ferð niður að skipsflakinu í kafbátnum en köfunin tekur allt að 10 klukkustundir þó að súrefnisbirgðirnar dugi í 96 klukkustundir, eins og áður segir.

Nú er hins vegar aðeins 50 klukkustundir til stefnu að bjarga kafbátnum og er útlitið afar svart.  Það er nefnilega ekki bara súrefnisleysið sem að fólkinu í kafbátnum gæti stafað hætta af. Ef kafbáturinn er enn fastur á hafsbotni, mögulega kræktur í flak Titanic, þá yrði kuldinn inni í hylkinu fljótlega lífshættulegur.

Vonir standa til að kafbáturinn hafi náð til yfirborðsins og sé þar á reki, sambandslaus við umheiminn. Ef báturinn er hins vegar fastur í Titanic-flakinu eða hefur sokkið á hafsbotninn þá er nánast útilokað að hægt verði að bjarga ferðalöngunum.