Þýska varnarmálaráðuneytið tilkynnti á laugardaginn að Þjóðverjar ætli að senda Úkraínumönnum vopn að verðmæti 2,7 milljarða evra. Er ætlunin að styrkja varnir Úkraínu gegn rússneska innrásarliðinu með þessu framlagi.

Í tilkynningu frá varnarmálaráðuneytinu segir að í pakkanum verði fjölbreytt úrval hertóla. Þar á meðal verða 30 Leopard-1 skriðdrekar, brynvarin fólksflutningatæki, drónar og skotfæri.

Þetta er stærsta einstaka framlag Þjóðverja til Úkraínu frá upphafi stríðsins.

Boris Pistorius, varnarmálaráðherra, sagði að með þessari sendingu, á hernaðarbúnaði sem brýn þörf sé fyrir, sýni Þjóðverjar að þeim sé full alvara með að styðja Úkraínu.

„Við viljum öll að þessu hræðilega árásarstríði Rússa gegn úkraínsku þjóðinni ljúki fljótt. Stríðið er brot á alþjóðalögum. En því miður eru stríðslok ekki í augsýn. Þjóðverjar munu því veita alla þá aðstoð sem þeir geta, eins lengi og þörf er á,“ sagði Pistorius.

Á þriðjudag í síðustu viku tilkynntu Bandaríkjamenn um nýjan hjálparpakka til Úkraínu að verðmæti 1,2 milljarða dollara. Honum er ætlað að styrkja loftvarnir og mæta þörfum úkraínska stórskotaliðsins nú í aðdraganda boðaðrar gagnsóknar Úkraínumanna.