Christian Brückner, alræmdur barnaníðingur og kynferðisbrotamann, er grunaður um að vera valdur að hvarfi Madeleine McCann, breska stúlkubarninu sem hvarf úr hótelíbúð í Algarve í Portúgal vorið 2007, er hún var fjögurra ára.

Brückner bjó í Algarve um það leyti sem barnið hvarf en hann afplánar nú í fangelsi í Braunschweig dóma fyrir kynferðisbrot og er til rannsóknar vegna fleiri brota. Hefur hann meðal annars verið kærður fyrir önnur kynferðisbrot sem áttu sér stað í Algarve um það leyti sem McCann hvarf. Eru rannsakendur nánast sannfærðir um að Brückner beri ábyrgð á hvarfi stúlkunnar.

Þýskur dómstóll í Braunschweig hefur nú úrskurðað að rannsakendur hafi ekki lögsöga í málinu til að sækja Brückner til saka. Lögmaður barnaníðingsins Friedrich Fulscher, greindi frá niðurstöðunni, en hann hefur nú farið fram á að málið gegn Brückner verði þegar í stað látið niður falla.

Um sannkallað reiðarslag er að ræða fyrir foreldra Madeleine McCann, Kate og Gerry, sem hafa verið óþreytandi við að grafa upp hvað varð um dóttur þeirra.

Brückner hefur sjálfur haldið fram sakleysi sínu í málinu og líkt því við nornaveiðar. Engar sannanir séu fyrir hendi um að hann beri ábyrgð á hvarfi stúlkunnar.

Fulltrúi saksóknara í Braunschweig gagnrýndi að lögmaður Brückner hefði fengið dóminn á undan embættinu. Fyrst myndu rannsakendur skoða úrskurðinn og taka svo ákvörðun um næsta skref, sem gæti þýtt að mál yrði höfðað fyrir öðrum dómstól.