Söfnun fyrir Eddu Falak á Karolina Fund hefur náð markmiði sínu og það á aðeins þremur dögum. Söfnun var sett af stað á Karolina Fund föstudaginn 7. apríl og stóð til að safna 1,5 milljón til að standa straum af kostnaði vegna áfrýjunar til Landsréttar, en Edda hyggst áfrýja dómi Héraðsdóms Reykjavíkur þar sem hún var dæmd fyrir brot á friðhelgi einkalífsins. 

Umrætt mál snerist um hljóðbrot sem spiluð voru í hlaðvarpsþættinum Eigin Konur en þar mátti heyra í móður láta ógeðfelld orð falla í garð dóttur sinnar sem var viðmælandi Eddu í þættinum.

Hljóðbrotin voru tekin upp án vitundar móðurinnar sem höfðaði mál fyrir héraðsdómi og krafðist 5 milljóna króna í miskabætur. Komst dómstóllinn að þeirri niðurstöðu að birting þeirra hafi brotið á friðhelgi einkalífs hennar og dæmdi Eddu til að greiða miskabætur upp á 400 þúsund krónur auk málskostnaðar.

Sjá einnig: Edda Falak áfrýjar dómi til Landsréttar – Hefur safnað um 1,2 milljónum fyrir málskostnaði

Hefur safnað rúmri 1,5 milljón

Í texta um söfnunina stendur: „Mikilvægt er að við náum að safna að lágmarki 2.500.000 kr. til að greiða málskostnað og miskabætur vegna dómsins sem féll móðurinni í vil og lögfræðikostnað til lögfræðinga Eddu til að hægt sé að áfrýja dómnum til Landsréttar.“

Aðeins var þó óskað eftir 1,5 milljón, og hún náðist og rúmlega það á sunnudagsmorgun. 84 einstaklingar hafa styrkt Eddu um rúmlega 1,5 milljón eða 1.518.420 kr.sem er 101% af heildarupphæðinni sem stefnt var að.

Ákvörðunin um áfrýjunina kom fram í aðsendri grein á Vísi eftir Sahöru Rós Ívarsdóttur sem unnin var í samráði við Eddu og dótturina. Þar jemur fram að málið megi ekki gleymast í þeirri „hatursorðræðu“  sem sé í gangi gegn Eddu.