DV sagði frá dýraníðsmáli í gær, en hópur barna á Eskifirði fann hræ af fimm kettlingum við árbakka í bænum um helgina.
Börn fundu kettlinga sem hafði verið drekkt – „Manneskja sem gerir svona á skilið fangelsisvist“
Þorsteinn Bergsson, starfsmaður hjá Matvælastofnun á Egilsstöðum, segir í samtali við Austurfrétt nokkrar ábendingar hafa borist um málið, sem verið er að vinna úr.
Um sé að ræða það alvarlegt brot að málið verði kært til lögreglu. Matvælastofnun geti hins vegar ekki beitt úrræðum því ekki er vitað hver gerði þetta.
Í frétt Austurfréttar er farið yfir nokkur lagaákvæði sem lúta að velferð dýra, tilkynningarskyldu einstaklinga ef grunur leikur á illri meðferð dýra og refsiábyrgð þeirra sem brjóta gegn velferð dýra.
„Leiki grunur á að meðferð á dýrum brjóti gegn lögum þessum eða reglugerðum settum samkvæmt þeim skal sá sem verður þess var tilkynna það Matvælastofnun eða lögreglu svo fljótt sem auðið er,“ segir um tilkynningaskyldu í lögum um velferð dýra nr 55/2013.
Í 45. grein laganna segir um refsiábyrgð að það varði mann sektum eða fangelsi allt að einu ári ef hann vanræki tilkynningarskyldu, umönnunarskyldur eða brotið sé gegn bannákvæðum. Sektir geta verið á bilinu frá 10.000 kr. til ein milljón króna.
„Við ákvörðun sekta skal m.a. tekið tillit til alvarleika brots, hvað það hefur staðið lengi, samstarfsvilja hins brotlega aðila og hvort um ítrekað brot er að ræða. Stjórnvaldssektum verður beitt óháð því hvort brot eru framin af ásetningi eða gáleysi.”
Matvælastofnun metur hvort brot telst meiriháttar, ef svo er ber stofnuninni að vísa málinu áfram til lögreglu. „Brot telst meiri háttar ef verknaður er framinn með sérstaklega vítaverðum hætti eða við aðstæður sem auka mjög á saknæmi brotsins.”