Peningastefnunefnd Seðlabanka Íslands tilkynnti rétt í þessu hækkun stýrivaxta um 0,5 prósentustig. Fréttablaðið greinir frá þessu. Stýrivextirnir eru því komnir í 6,5 prósent en voru 0,75 prósent í maí árið 2021.
Hækkunin er í samræmi við spár greiningardeilda bankanna, sem spáðu 0,5 prósentustiga hækkun eftir að vísitala neysluverðs hækkaði meira en búist var við milli desember og janúar.
Vísitalan hækkaði um 0,85 prósent milli mánaða og ársverðbólgan úr 9,6 prósentum í 9,9 prósent.
Hægt er að rekja nær alla hækkun vísitölunnar í janúar til gjaldskrárhækkana opinberra aðila.
