Söngkonan Björk seldi þakíbúð sína í Brooklyn í New York fyrir sex milljónir dollara, eða um 768 milljónir í íslenskum krónum þegar kaupin fóru í gegn í lok mars í fyrra.
Viðskiptablaðið greinir frá og vísar í gögn frá fasteignaskrá New York. Íbúðin fór fyrst í sölu í september árið 2018 og vildi Björk þá fá níu milljónir dollara, sem samsvarar um milljarði í íslenskum krónum á þeim tíma. Þakíbúðin er um 280 fermetrar, en Björk keypti íbúðina upphaflega með fyrrverandi eiginmanni sínum, Matthew Barney, fyrir fjórar milljónir dollara. Björk keypti eignarhlut Barney í kjölfar skilnaðar þeirra árið 2013.
