Ástæðan er að leiðtogafundur Evrópuráðsins verður haldinn í Reykjavík um miðjan maí. Meðal þeirra leiðtoga sem eiga rétt á því að taka þátt í fundinum er Volodymyr Zelenskyy, forseti Úkraínu. Í heildina er von á leiðtogum 46 ríkja til landsins vegna fundarins. Auk þeirra koma sendinefndir með þeim og öryggisverðir og því ljóst að um mjög fjölmennan fund verður að ræða þar sem fjöldi háttsettra aðila verður samankomin.
Morgunblaðið skýrir frá því í dag að ríkislögreglustjóri hafi sent viðvörun til annarra ríkislögreglustjóra á Norðurlöndunum um að hugsanlega verði óskað eftir aðstoð frá þeim vegna öryggisgæslu. Ef það verður gert, verður það í fyrsta sinn í sögunni sem slíkt er gert í tengslum við fundargæslu.
Fyrir liggur að mörg hundruð íslenskir lögreglumenn, frá öllum lögregluembættum landsins, munu sinna öryggisgæslu vegna fundarins.
Þetta verður umfangsmesta verkefni lögreglunnar frá upphafi. Mun stærra en fundur utanríkisráðherra aðildarríkja NATO og samstarfsríkja bandalagsins árið 2002.
Eins og áður sagði er Zelenskyy boðið til fundarins en ekki hefur verið staðfest að hann komi og má leiða líkum að því að koma hans, ef hann kemur, verði ekki staðfest nema með mjög skömmum fyrirvara af öryggisástæðum. Þjóð hans berst gegn rússneska innrásarhernum og vitað er að Rússar vilja hann gjarnan feigan. Miklar öryggisráðstafanir eru því í kringum hann og ferðum hans er haldið vandlega leyndum.
