Samkeppniseftirlitið hefur ógilt kaup Kaupfélags Skagfirðinga á Gunnars ehf. Mbl.is greinir frá þessu. Skagfirska stórveldið festi kaup á majonesfyrirtækinu gamalgróna síðastliðið vor.
Saga Gunnars Majoness er löng og skrautleg en fyrirtækið var stofnað árið 1968 af Gunnari heitnum Jónssyni. Árið 2009 var Kleópötru Kristbjörgu Stefánsdóttur ráðin forstjóri fyrirtækisins og kom það á óvart enda hafði hún stundað andleg fræði og bókaskrif en ekki viðskipti. Fyrirtækið hét þá Gunnars Majones hf en það varð gjaldþrota árið 2014. Kleópatra keypti upp eignir þrotabúsins fyrir á 62 milljónir og hélt rekstrinum áfram undir nafninu Gunnars ehf.
„Með kaupum KS á Gunnars hefðu runnið saman tveir af stærstu framleiðendum á majónesi og köldum sósum á Íslandi,“ segir í fréttatilkynningu frá Samkeppniseftirlitinu sem mbl.is greinir frá. „Gunnars er eins og kunnugt er sterkt vörumerki í þessum vöruflokki og KS framleiðir og dreifir sömu vörutegundum undir merkjum E. Finnsson og eftir atvikum Vogabæjar, auk þess sem báðir aðilar framleiða þessar vörur einnig fyrir önnur fyrirtæki. Báðir aðilar selja sömu vörutegundir til dagvöruverslana og stórnotenda,“ segir ennfremur.
Segir Samkeppniseftirlitið að með samrunanum myndist markaðsráðandi staða á markaði fyrir hreint majónes og aðrar tilbúnar, kaldar sósur. Sameinað fyrirtæki hefði orðið það stærsta á þessu markaði og fengi mikla yfirburði yfir helsta keppinautinn, Kjarnavörur. Með samrunanum hyrfi mikilvægur keppinautur af sviðinu og með honum mikilvægt samkeppnislegt aðhald. Ennfremur telur stofnunin að samruninn myndi valda skaðlegum útilokunaráhrifum á markaðnum.
DV náði sambandi við Sævar Þór Jónsson, lögmann Gunnars ehf. Hann segir nýtt söluferli ekki útilokað. „Við erum að skoða og meta málið og hvort við förum í nýtt söluferli,“ segir Sævar.
