Í lok desember fóru Craig McKinnon og Jess Prinsloo í draumaferð sína til Suður-Afríku. Þann 27. desember bar Craig upp bónorð og Jess játaðist honum. En aðeins fjórum dögum síðar lést hún.

Mirror segir að talið sé að hún hafi látist eftir að hafa notað ranga teskeið til að hræra í teinu sínu.

Það gerðist heima hjá móður hennar í Jóhannesarborg. Þar tók Jess skeið, sem hafði komist í snertingu við mjólkurafurðir, og hrærði í teinu sínu með henni. Nokkrum sekúndum eftir að hún drakk úr tebollanum fékk hún bráðaofnæmiskast þar sem háls hennar bólgnaði upp. Hún var strax flutt á sjúkrahús en þar lést hún daginn eftir.

Það var vitað að Jess var með ofnæmi fyrir mjólkurvörum og því var hún alltaf með tvo ofnæmispenna með sér ef hún skyldi fá ofnæmiskast. En þeir virkuðu ekki í þetta sinn.

Craig og Jess kynntust 2019 og byrjuðu að búa saman 2021.

En í stað þess að koma heim til Englands til að byrja að undirbúa brúðkaup, þá kom Craig einn heim með ösku Jess með í farteskinu.