Ég hef jafnframt óskað eftir því að skóla- og frístundasvið fjalli um öskudag og aðra hátíðisdaga í skólunum, þannig að við lærum af þessu máli og línur séu skýrar“
Dagur B. Eggertsson fundaði með stjórnendum Fellaskóla í morgun samkvæmt dagbók borgarstjóra sem hann sendi á fjölmiðla í dag.
Sjálfur skrifar Dagur: „Víða hefur þróunin verið í þá veru að skólastarf sé óhefðbundið þennan dag og jafnvel hent í pylsu- eða pizzupartý eftir óvenju stuttan skóladag sem lýkur á hádegi. Það urðu því hörð viðbrögð við fréttum af því að barn í Fellaskóla hafi ekki fengið að taka þátt í pizzu-veislu í skólanum. Mér fannst ástæða til að kalla eftir skýringum á þessu því öll börn eiga að fá að vera með þegar slegið er upp veislu í skólunum og mikilvægt að ekkert barn sé skilið útundan.“
Þarna vitnar hann til fréttar Fréttablaðsins um unga stúlku sem fékk ekki að kaupa pítsusneið í tilefni dagsins vegna stífra reglna þegar kemur að mataráskrift í skólum.
Dagur skrifar: „Á góðum fundi sem ég átti með skólastjórnendum í Fellaskóla í morgun kom fram að skólinn hafði ekki litið þannig á að þetta væri pizzu-veisla vegna öskudags heldur hefðbundinn hádegismatur fyrir þau börn sem eru í mataráskrift.“
Dagur segir að sum barnanna höfðu þó greinilega væntingar um annað og því varð þessi leiðinlegi árekstur.
„Fellaskóli hefur reyndar staðið sig sérstaklega vel þegar kemur að matarmálum, með hafragraut á morgnanna og ávexti yfir daginn og hafa framfarir í námsárangri einnig óvíða verið meiri en einmitt þar. Ég ber fullt traust til stjórnenda skólans við að vinna úr þessu máli þannig að það skilji ekki eftir sig sár. Ég hef jafnframt óskað eftir því að skóla- og frístundasvið fjalli um öskudag og aðra hátíðisdaga í skólunum, þannig að við lærum af þessu máli og línur séu skýrar,“ skrifar Dagur svo.