„Það þarf svona mann í borgarstjórastólinn. Þá værum við ekki föst í snjósköflum dögum saman eða í mygluðu húsnæði,“ segir Brynjar Níelsson, aðstoðarmaður dómsmálaráðherra, Jóns Gunnarssonar, í FB-færslu þar sem Brynjar mærir yfirmann sinn.

Brynjar segir að meirihlutinni í borginni hafi tilhneigingu til að reyna að syngja sig út úr vandanum en dómsmálaráðherra sé hins vegar maður sem láti verkin tala:

„Það dugar ekki að syngja sig út úr vandanum eins og meirihlutinn í borginni reynir gjarnan. Í hvert sinn sem þetta ágæta fólk fer í fjölmiðalviðtöl langar mann að hoppa ofan í bjútiboxið og loka á eftir sér.“

Brynjar fer nokkrum orðum um afrekaskrá Jóns í hans stuttu valdatíð. Meira hafi verið gert í erfiðum málaflokkum ráðuneytisins í tíð Jóns en áður hafi þekkst:

„Það er nú samt þannig að í tíð þessa dómsmálaráðherra hefur verið gert meira í þessum málaflokkum en áður hefur þekkst, eins og sjá má hér. Þá lagði hann fram frumvarp á síðasta vorþingi um bætta réttastöðu brotaþola sem var samþykkt samhljóða. Þá hafa verið tekin stór skref í eflingu lögreglu, ákæruvalds og dómstóla í héraði til að auka hagkvæmni og skilvirkni í réttarkerfinu til hagsbóta fyrir alla.“