Íslenska karlalandsliðið tapaði gegn Suður-Kóreu ytra í vináttulandsleik í dag.

Það var leikið í Seúl. Min-Kyu Song kom heimamönnum yfir á 33. mínútu og reyndist það eina mark leiksins. Sigurinn var nokkuð sanngjarn.

Lið Íslands í dag var töluvert breytt frá því sem vanalegt er og mikið til skipað af leikmönnum í Bestu deildinni hér heima.

Þetta var annar vináttulandsleikur liðsins í vikunni. Það tapaði sömuleiðis 1-0 gegn Sádi-Arabíu á sunnudag.

Bæði þessi lið eru á leið á Heimsmeistaramótið í Katar síðar í þessum mánuði.

Ísland er nú á leið í Eystrasaltsbikarinn, þar sem liðið mætir Litháen á miðvikudag. Fyrir þann leik koma mun reynslumeiri landsliðsmenn inn í hópinn.