Athafnamaðurinn Einar Bárðarson verður ekki viðstaddur landsfund Sjálfstæðismanna á morgun og reiknast það til að þetta sé í fyrsta sinn í um 30 ár sem hann fái ekki að taka þátt í fundinum. Hann vekur athygli á þessu á Facebook.

„Í fyrsta sinn líklega í 30 ár fæ ég ekki að sækja Landsfund Sjálfstæðismanna. Eftir áratugi af trúnaðarstörfum í ýmsum félögum, fjáröflun og setu í miðstjórn flokksins.

Mér var það sérstakt kappsmál að komast á fundinn þar sem ég er í framboði á fundinum til Umhverfis- og samgöngunefnd flokksins þar sem ég brenn fyrir umhverfismál eins og fólk vonandi veit.“

Veltir Einar því fyrir sér hvort þétta sé vegna þess að hann gæti mögulega hafa verið merktur sem stuðningsmaður Guðlaugs Þórs Þórðarsonar sem er í framboði til formanns flokksins.

„Þetta kemur mér spánskt fyrir sjónir og ég er að velta fyrir mér hvað veldur en kannski er það vegna þess að ég held með Liverpool eða búið að merkja mig sem stuðningsmann Gulla. Óska vinum mínum góðrar helgar og vonandi verður fundurinn gæfuríkur fyrir starf flokksins.“