Jacub Neestrup, þjálfari FC Kaupmannahafnar, lofsyngur Hákon Arnar Haraldsson eftir frammistöðu leikmannsins gegn Dortmund í Meistaradeild Evrópu.
FCK var þegar úr leik fyrir einvígið á Parken í gær en náði í gott 1-1 jafntefli við Dortmund. Hákon var frábær í leiknum og skoraði mark FCK.
Hinn 19 ára gamli Hákon er búinn að festa sig í sessi sem einn besti leikmaður danska stórliðsins.
„Hákon er búinn að sýna að hann getur orðið frábær sóknarmaður fyrir FCK,“ segir Neestrup.
Neestrup líkir Hákoni við Pep Biel, sem lék með FCK frá 2019 þar til hann var seldur til Olympiacos í sumar.
„Þetta var eins og að sjá Pep Biel upp á sitt besta, það sem hann gerði í dag.
Hákon hefur sýnt að hann getur pressað endalaust. Það er klikkað hverju hann skilar í pressunni í dag. Svo bindur hann leik okkar vel saman, skapar mikið og skorar mikið.“
Neestrup sér fyrir sér að Hákon muni ná mjög langt.
„Hann hefur burði til að ná langt, eins og allir þeir frábæru leikmenn sem við höfum verið með.“
Sjá einnig: Hákon nefnir andstæðinginn sem kom mest á óvart í Meistaradeildinni