Breski osteopatinn, Jemma Mitchell, hefur verið sökuð um að hafa myrt vinkonu sína eftir að þeim varð sundurorða.

Breskir saksóknarar halda því fram að Jemma hafi myrt vinkonu sína, Mee Kuen Chong, 67 ára að aldri, og því næst afhöfðað hana og komið líkamsleifunum fyrir í ferðatösku sem hún losaði sig við á strönd í suðurhluta Englands.

Kona sem var í fríi með fjölskyldu sinni fann líkamsleifar Mee í júní. „Þegar þau gengu til baka frá ströndinni að sumarhúsi sínu gerðu þau hrottalega uppgötvun; þau fundu höfuðlaust lík konu,“ sagði saksóknarinn Deanna Heer fyrir dómi.

Höfuð Mee fannst svo nokkrum dögum síðar í gróðri skammt frá staðnum þar sem líkið fannst.

Saksóknarar halda því fram að Mee hafi boðist til að lána Jemmu töluvert mikið af peningum svo sú síðarnefnda gæti ráðist í endurbætur á heimili sínu. Mee hafi þó fengið bakþanka og hætt við gjörninginn sem hafi svo haft áðurnefndar afleiðingar.

Jemma hefur neitað sök.

Saksóknarar hafa þó bent á þó nokkrar staðreyndir sem bendi til sektar Jemmu. Við húsleit hjá Jemmu fannst erfðaskrá í nafni Mee þar var Jemma útnefnd sem erfingi. Og eins þótti höfuð Mee hafa verið skorið af líkama hennar af einstakri nákvæmni en Jemma hafði í mannfræði námi í háskólanum tekið áfanga þar sem henni var kennt að kryfja mannslíkamann og hafi líka tekið sérstakan áfanga í anatómíu. Þar hafi hún skarað fram úr og fengið verðlaun fyrir frammistöðu sína.

Eins séu til upptökur úr eftirlitsmyndavélum sem sýni Jemmu yfirgefa heimili Mee skömmu eftir dánarstund hennar með tvær ferðatöskur sem hafi greinilega verið mjög þungar. Saksóknari heldur því fram að lík Mee hafi verið í töskunum.

Eins séu til upptökur sem sýni Jemmu aka í nágrenni við þann stað þar sem líkið fannst.

„Ákæruvaldið telur að hún hafi ráðist á og drepið hina látnu og svo flutt líkama hennar til Salcombe í þessari stóru bláu ferðatösku og reynt þar að losa sig við líkið í skóginum við Bennett veg.“

Nánar má lesa um málið hjá The Daily Mail