Maður sem situr í gæsluvarðhaldi vegna andláts Tómasar Waagfjörð á Ólafsfirði þann 3. október er sagður, samkvæmt heimildum DV, neita því að hafa borið ábyrgð á dauða hans. Tómas Waagfjörð hafi ráðist á hann, en ekki öfugt. Leiðir hann líkur að því að áverkar sem drógu Tómas til dauða hafi orðið til af slysni er hann reyndi að verjast atlögum Tómasar.
Maðurinn var í gær úrskurðaður í fjögurra vikna gæsluvarðhald. Hann hefur áður verið dæmdur fyrir afbrot, m.a. fíkniefnasölu, ofbeldisbrot og vopnalagabrot. DV hefur einnig heimildir fyrir því að hann eigi ákærur yfir höfði sér vegna afbrota og séu nokkur slík mál í gangi. Mögulegt er að það hafi haft áhrif á gæsluvarðhaldsúrskurðinn.
Áður hefur komið fram að maðurinn fékk hnífstungu í fót í átökunum en vitni sem kom á vettvang á undan lögreglu og sjúkraliði batt um það sár. Nýrri heimildir DV herma einnig að hann hafi verið stunginn í andlitið og hann hafi auk þess verið með fleiri smærri áverka eftir hnífinn víðsvegar um líkamann.
Að sögn vitnis var mikið blóð á vettvangi, íbúðin hafi verið eins og blóðvöllur.
Tómas fékk hnífstungu í magann en samkvæmt heimildum DV neitar maðurinn að hafa stungið hann þar, a.m.k. segist hann ekki hafa gert það viljandi.
Um síðustu helgi tók Mannlíf viðtal við föður eiginkonu Tómasar Waagfjörð. Sá maður staðhæfði að Tómas hefði beitt hana ofbeldi og telur hann að sá sem grunaður er um að hafa banað Tómasi hafi gert það í sjálfsvörn. Samkvæmt heimildum DV er allsendis óvíst að maðurinn beri við sjálfsvörn, hann telji alveg eins að banastungan hafi orðið fyrir slysni og Tómas hafi rétt eins getað hafa veitt sér hana eins og hann.
Eins og áður hefur komið fram áttu hinn grunaði og Tómas í deilum um eiginkonu Tómasar, en hinn grunaði er vinur hennar. Rétt fyrir dauða sinn fór Tómas bálreiður á vettvanginn, þ.e. í íbúð í miðbæ Ólafsfjarðar þar sem eiginkona Tómasar, vinkona hennar (húsráðandi) og hinn grunaði voru fyrir. Tómas bjó í sömu götu. Rétt eftir að hann kom á vettvang, eða þegar í stað, brutust út átök sem enduðu með dauða Tómasar.
Óstaðfestar heimildir DV herma að eiginkona Tómasar styðji framburð mannsins. Út frá viðtali Mannlífs við föður hennar má einnig leiða líkur að því.
