Ævaforn handrit, gamlir vasar með fallegum myndum, sem sýna minnstu smáatriði, og fornleifafundir hafa veitt okkur upplýsingar um fortíðina. Nú er ekki annað að sjá en enn eitt púslið um fortíð okkar hafi fundist.

Rannsóknir á leifum af 30 beinagrindum, sem voru grafnar fyrir um 2.500 árum undan norðurströnd Sikileyjar á Ítalíu, hafa leitt í ljós í að málaliðar ferðuðust mörg þúsund kílómetra til að taka þátt í orustu við grísku nýlenduna Himera sem var á Sikiley.

Science hefur eftir Carrie Sulosky Weaver, fornleifafræðingi við University of Pittsburg, að niðurstöðurnar séu „ótrúlegar“. Hún kom ekki að rannsókninni.

Beinagrindurnar fundust í fjöldagröf.

Weaver sagði að það sé ótrúlegt hversu mikið sé hægt að lesa um eldgamla atburði úr gögnum af þessu tagi.

Gamlir grískir höfundar gerðu orustunni skil á sínum tíma og lýstu því hvernig nágrannanýlendur komu grísku hersveitunum frá Himera til aðstoðar. En í þær frásagnir vantar eitt mikilvægt atriði.

„Grikkirnir höfðu líklega ekki áhuga á að láta hóp málaliða fá heiðurinn af hernaðarsigrum sínum,“ sagði Gillian Shepherd, fornleifafræðingur, við La Trobe University í Ástralíu, í samtali við Science.

Flestir hinna föllnu hermanna voru ekki frá svæðinu í kringum Sikiley heldur frá Miðasíu, Kákasus, Mið-Evrópu og Eystrasalti. Þetta sýna erfðarannsóknir á beinunum.

Rannsóknirnar leiddu einnig í ljós að hinir föllnu voru almennt við góða heilsu og voru því varla þrælar. Þetta bendir til að þeir hafi verið málaliðar.