Marga dreymir um að finna eitthvað magnað þegar þeir skipta um gólfið heima hjá sér, að fjársjóður leynist undir gólffjölunum. Fyrir breskt par þá varð þetta meira en bara draumur því þetta gerðist þegar þau voru að gera endurbætur á húsinu sínu.

Parið var að gera endurbætur á húsinu sínu, sem er í Ellerby í North Yorkshire á Englandi. Þegar þau rifu gólfin upp fundu þau fjársjóð frá Miðöldum og hann er mikils virði. Þetta kom þeim mjög á óvart því húsið er ekki sérstaklega gamalt.

Þegar parið kom niður í gegnum gólfið og steypulag fann það fjársjóðinn. Hann var í litlum kassa. Þegar þau opnuðu hann trúðu þau ekki eigin augum því hann var fullur af gulli. Nánar tiltekið 260 gullpeningar sem eru taldir hafa verið notaðir á átjándu öld.

Að mati uppboðshússins Spink and Son er verðmæti myntanna sem nemur um 40 milljónum íslenskra króna. Í fréttatilkynningu frá uppboðshúsinu kemur fram að það sé frábært og óvænt að fjársjóðurinn hafi fundist á þessum stað. Þetta sé einn stærsti fornleifafundurinn frá þessum tíma.

Í fréttatilkynningunni segir að myntin hafi næstum örugglega tilheyrt Joseph og Sarah Fernley-Maisters sem gengu í hjónaband 1694. Þau tilheyrðu áhrifaríkri fjölskyldu sem átti fyrirtæki í námuvinnslu frá sautjándu öld fram á þá nítjándu.

Bank of England, enski seðlabankinn, var stofnaður 1694 og byrjaði að gefa út pappírsseðla á átjándu öld. Talið er að hjónin hafi ekki trúað á þetta nýja peningakerfi og því geymt myntina til öryggis.