Hjördís Gunnarsdóttir, ekkja Tómasar Tómassonar, fyrrverandi sendiherra, færði Tímófei Zolotusky, presti rússnesku Rétttrúnaðarkirkjunnar á Íslandi bókagjöf til minningar um fyrrverandi eiginmann sinn, í guðsþjónustu söfnuðar kirkjunnar síðasta sunnudag.
Sagði Hjördís það von sína og fjölskyldu sinnar að bækurnar héldu minningu eigimanns síns á lofti og kæmu að góðum notum fyrir söfnuðinn og fjölda rússneskumælandi íbúa Íslands. Tómas var sendiherra Íslands í Sovétríkjunum, en þar að auki var hann fulltrúi landsins hjá SÞ og NATO.
Faðir Tímófei þakkaði kærlega fyrir þessa merku gjöf og gaf Hjördísi rússneska helgimynd eða íkon og blómvönd. Lögð var áhersla á að viðburðurinn væri trúar- og menningarlegs eðlis, engan veginn tengdur stjórnmálum. Um er að ræða fleiri kassa af merkum bókum, þar á meðal fjölda orðabóka, söguleg efni, vísindarit og skáldsögur. Í söfnuðinum eru um þúsund manns frá 17 löndum, þar á meðal: Íslandi, Búlgaríu, Serbíu, Hvítarússlandi, Rússlandi, Úkraínu, Georgíu, Armeníu, Moldavíu, Rúmeníu, Póllandi, Eystrasalstlöndum og víðar. Til stendur að byggja kirkju í vesturbæ Reykjavíkur en guðsþjónustur fara nú fram í íbúðarhúsnæði við Öldugötu.
Viðstaddir voru Ólafur Egilsson, fyrrverandi sendiherra, Helgi Ágústsson, fyrrum sendiherra, Mikhail Noskov, sendiherra Rússlands á Íslandi og Gunnlaugur Garðarsson, prestur.
