Bjarni Jóhannsson verður ekki áfram hjá karlaliði Njarðvíkur á næstu leiktíð. Félagið staðfestir þetta í nýrri færslu á samfélagsmiðlum.
Undir stjórn hans gjörsigraði Njarðvík 2. deild í sumar og leikur því í Lengjudeildinni að ári.
Bjarni tók við stjórn Njarðvíkur seint árið 2020 og hefur verið mikill stígandi hjá liðinu síðan þá.
Yfirlýsing Njarðvíkur
Bjarni Jóhannsson, hefur ákveðið að framlengja ekki samningi sínum við knattspyrnudeild Njarðvíkur.
Bjarni tók við þjálfun liðsins ásamt Hólmari Erni í nóvember 2020 og hefur frá fyrsta degi sett sinn svip á félagið. Bjarni ásamt sínu teymi náði mögnuðum árangri með Njarðvíkurliðið í ár en liðið sigraði 2. deildina með 55 stig, skoraði 63 mörk og fengu aðeins 22 mörk á sig. Þá sigraði Njarðvíkurliðið einnig Lengjubikarinn í B-deild.
Bjarni var að ljúka sínu 34. ári í meistaraflokksþjálfun karla en hann hóf þjálfarferilinn á heimaslóðunum með Þrótti Neskaupstað. Á sínum ferli hefur Bjarni þjálfað Tindastól, Grindavík, Breiðablik, ÍBV, Fylki, Stjörnuna, KA og Vestra ásamt því að hafa verið aðstoðarlandsliðsþjálfari Íslands en hann hefur lyft öllum helstu titlum sem hægt er að vinna hér á landi.
Knattspyrnudeild Njarðvíkur þakkar Bjarna kærlega fyrir sitt framlag til félagsins en félagið hefur vaxið mikið frá því að Bjarni kom til klúbbsins.
Við væntum þess að Bjarni verði áfram reglulegur gestur í vallarhúsinu hjá okkur Njarðvíkingum.
