Sigrún býr á Akureyri en þar hefur hún haldið úti mataraðstoð fyrir bágstadda í átta ár. Fréttablaðið skýrir frá þessu.
„Ég var sjálf í þessari stöðu fyrir mörgum árum að eiga ekki fyrir mat. Það sem keyrir mig áfram er að hjálpa fólki, það er skelfilegt að geta ekki sofið út af fjárhagsáhyggjum,“ er haft eftir henni.
Hún segir að sjaldan eða aldrei hafi ástandið verið verra en nú. Um 240 fá mataraðstoð sem hún og velunnarar standa fyrir. Fólk gefur peninga til starfsins en einnig kemur fólk með matarframlög og setur í kistil sem stendur á tilteknum stað á Akureyri. Þar geta efnalitlir sótt brauð, kjöt og aðra matvöru sem hjálpsamt fólk skilur eftir.
Sigrún sagði að minni skömm fylgi því fyrir efnalitla að þiggja aðstoð með þessum hætti en að standa í biðröð hjá Rauða krossinum eða Mæðrastyrksnefnd, þar sem þarf jafnvel að skila skattskýrslu. „Fólk skammast sín fyrir að þurfa að þiggja svona aðstoð þannig að við ákváðum að okkar fyrirkomulag yrði auðveldara fyrir fólk,“ sagði hún.
„Ástandið er alveg skelfilegt og það á bara eftir að versna. Húsaleiga hækkar, matvara hefur hækkað rosalega. Fólk hefur ekki efni á að borða, það á ekki fyrir reikningum. Ég er núna að fá beiðnir strax í byrjun mánaðar. Fólk á ekki neitt. Þetta samfélagsástand bitnar verst á þeim sem standa höllum fæti,“ sagði hún og bætti við að Íslendingar verði að viðurkenna að fátækt sé mein hér á landi.
