Manchester United og Juventus hafa náð samkomulagi um kaupverðið á Adrien Rabiot, miðjumanni síðarnefnda félagsins. Sky Sports segir frá.
Rauðu djöflarnir hafa verið á höttunum eftir miðjumanni í allt sumar. Þar hefur Frenkie de Jong verið efstur á blaði.
De Jong vann með Erik ten Hag, stjóra Man Utd, hjá Ajax og þekkjast þeir því vel. Það virðist þó ekki ætla að ganga upp að fá de Jong á Old Trafford í sumar.
Nú gæti Rabiot komið. Man Utd á þó enn eftir að semja við leikmanninn sjálfann um hans kaup og kjör.
Hinn 27 ára gamli Rabiot á ár eftir af samningi sínum við Juventus. Hann kom til félagsins frá Paris Saint-Germain sumarið 2019. Frakkinn hefur skorað sex mörk og lagt upp sex í 129 leikjum.
Þá hefur Man Utd einnig áhuga á að fá Marko Arnautovic frá Bologna. Tilboði enska félagsins upp á níu milljónir evra var hafnað um helgina.
