Nú stendur hin árlega „Economic Forum“ ráðstefna yfir í St. Pétursborg í Rússlandi en henni lýkur á laugardaginn. Þar er fjöldi rússneskra og alþjóðlegra kaupsýslumanna samankominn. Á morgun mun Vladímír Pútín, Rússlandsforseti, ávarpa ráðstefnuna og segja rússneskir fjölmiðlar að um „gríðarlega mikilvæga“ og „mjög áhugaverða“ ræðu verði að ræða.

Dagbladet skýrir frá þessu. Segir blaðið að rússneskir fjölmiðlar hafi skýrt frá þessu en hafi ekki farið nánar út í hvað Pútín ætlar að tala um.

Ráðstefnan í St. Pétursborg er ekki svipur hjá sjón miðað við það sem verið hefur undanfarin ár. Margir þeirra, sem eru vanir að sækja hana, sæta nú refsiaðgerðum Vesturlanda og gera allt sem þeir geta til að forðast sviðsljósið. Margir hafa einnig sleppt því að sækja ráðstefnuna að þessu sinni af ótta við að verða beittir refsiaðgerðum ef þeir gerðu það.

Engin stór alþjóðleg fyrirtæki sendu fulltrúa á ráðstefnuna og margir fundargestir ætla heim áður en Pútín flytur ávarp sitt.