Jens Gunnarsson lögreglumaður, sem sat í gæsluvarðhaldi á Litla-Hrauni og í einangrun, er grunaður um óeðlileg tengsl við brotamenn. Samkvæmt heimildum dv.is er Jens grunaður um að hafa tekið við greiðslum í skiptum fyrir upplýsingar úr fíkniefnadeild lögreglunnar. Öruggar heimildir DV herma að lögreglan hafi grun um að um fastar mánaðarlegar greiðslur sé að ræða sem nema um mánaðar grunnlaunum almenns lögreglumanns, eða í kringum 300 þúsund. Ekki er vitað hversu lengi þessar meintu greiðslur hafa staðið yfir.

Það vakti mikla athygli þegar greint var frá því að lögreglumaður sæti í einangrun á Litla-Hrauni. Jens var látinn laus á fimmtudag. Hann neitar sök. Þá hefur annar maður verið handtekinn í tengslum við málið.

Dv.is hefur rætt við tvo fyrrverandi fíkniefnasölumenn sem greina frá því að ekki sé nýtt af nálinni að lögreglumenn taki við greiðslum gegn upplýsingum, þá til dæmis til að vara við að leita eigi á heimili viðkomandi.

Samstarfsfólk Jens er í áfalli og hefur þegið áfallahjálp eftir að málið kom upp. Sigríður Björk Guðjónsdóttir lögreglustjóri segir að málið hafi komið samstarfsmönnum í opna skjöldu og er Jens lýst sem yfirveguðum og faglegum og hingað til talinn stálheiðarlegur í öllu sínu starfi.