Þessi aðstoð Bandaríkjamanna var lykilatriði í að Úkraínumönnum tókst að tefja sókn Rússa og meðal annars hrekja þá frá Kyiv Oblast, héraðinu sem höfuðborgin Kyiv er í, þar sem barist var vikum saman.
Á öðrum degi stríðsins skutu Úkraínumenn stóra rússneska flutningaflugvél niður við Vasylkiv, sem er í nágrenni við Kyiv. Í vélinni voru að sögn mörg hundruð fallhlífahermenn sem áttu að hertaka flugvöllinn við Hostomel. Það voru upplýsingar frá bandarískum leyniþjónustustofnunum sem gerðu Úkraínumönnum kleift að skjóta flugvélina niður.
Bandarísku upplýsingarnar hafa gert Úkraínumönnum viðvart um hvar Rússar ætla að gera árásir og einnig leiðbeint þeim um hvernig þeir geta gert gagnárásir. Talsmaður bandaríska þjóðaröryggisráðsins sagði að Bandaríkjamenn láti Úkraínumönnum oft í té mjög nákvæmar og réttvísandi upplýsingar til að aðstoða þá við að verja landið gegn rússneska innrásarhernum og verði því haldið áfram.
