„Slappur.“ „Veikburða.“ „Einbeitingarskortur.“ „Í ójafnvægi.“ Þetta eru nokkur af þeim orðum sem hafa verið notuð að undanförnu til að lýsa þeim Vladímír Pútín, Rússlandsforseta, sem hefur birst á myndbandsupptökum.

Fjöldi orðróma er á kreiki um heilsufar hans og á mánudaginn bar það á góma á fréttamannafundi í Hvíta húsinu. Einn fréttamannanna spurði út í orðrómana um heilsufar Pútíns en þeir hafa verið á sveimi síðan hann fyrirskipaði rússneska hernum að ráðast inn í Úkraínu.

„Það hafa verið ýmsar vangaveltur um heilsufar Vladímír Pútíns á grunni nýrra mynda af honum. Hefur Hvíta húsið lagt mat á málið? Hafa áhyggjur af þessu yfirhöfuð verið ræddar?“ spurði fréttamaðurinn.

Til svara var Jen Psaki, fréttafulltrúi Hvíta hússins: „Ég hef engin gögn. . . til að tjá mig sérstaklega um andlegt heilsufar Pútíns forseta.“