Tveir rúmenskir félagar hafa verið sakfelldir fyrir langan lista af þjófnaðarbrotum sem þeir frömdu saman síðastliðið haust, víðsvegar um landið. Ekki hefur tekist að birta félögunum dóm sem kveðinn var upp gegn þeim þann 15. desember síðastliðinn. Annar mannanna er ungur að árum, fæddur árið 1994, en hinn er miðaldra, fæddur árið 1975.
Þjófnaðarbrotin eru samtals níu og voru framin í september og október síðastliðið haust. Mennirnir stálu meðal annars tveimur Canada Goose úlpum úr verslun Bláa lónsins, sem og þremur dýrum húfum.
Einnig stálu þeir ilmvötnum fyrir 155 þúsund kall úr verslun Lyfju á Akureyri, þeir stálu ilmvötnum fyrir rúmlega 220 þúsund krónur úr Hagkaupum úr Skeifunni, stálu 66°N úlpum úr verslun 66°Norður á Akureyri og stálu fatnaði að verðmæti 163.000 kr. úr Sports Direct úr Kópavogi.
Félagarnir játuðu brot sín skýlaust fyrir dómi. Eldri maðurinn var dæmdur í fimm mánaða fangelsi en þrír mánuðir af því eru skilorðsbundnir. Yngri maðurinn var dæmdur í þriggja mánaða fangelsi en tveir mánuðir eru skilorðsbundir.
Mennirnir eru auk þess dæmdir til að greiða Bláa Lóninu tæplega 340 þúsund í skaðabætur og Högum tæplega 200 þúsund krónur.
Mennirnir tveir finnast ekki og hefur þeim því verið birtur dómurinn í Lögbirtingablaðinu.
