Frá og með deginum í dag krefjast Rússar þess að Evrópuríki greiði þeim í rúblum fyrir það gas sem þau kaupa af Rússum. Vladímír Pútín, forseti, skrifaði undir tilskipun þessa efnis í gær.

Pútín krefst þess að þau ríki, sem vilja kaupa rússneskt gas, stofni bankareikninga í rússneskum bönkum og að þeir séu í rúblum. Ef ekki verði einfaldlega skrúfað fyrir gasstreymið.

Trine Berling Villumsen, sérfræðingur hjá DIIS í Danmörku, sagði það vera rétt sem Þjóðverjar segi, að þetta sé „tilraun til fjárkúgunar“.

Krafan gildir einungis um ríki sem Rússar skilgreina sem „óvinveitt“.

„Ef við byrjum að opna reikninga í rússneskum bönkum og greiða í rúblum þá förum við fram hjá þeim refsiaðgerðum sem við gripum til. Þetta er ótrúlega snjallt herkænskubragð hjá Pútín,“ sagði hún.