Edda Sif Pálsdóttir íþróttafréttakona varð fyrir alvarlegri líkamsárás fyrir tíu árum síðan og urðu miklar umræður og vangaveltur í samfélaginu í kjölfar árásarinnar. Hún kærði fjölmiðlamanninn Hjört Hjartarson fyrir líkamsárás árið 2012 en málið fór ekki fyrir dóm þar sem þau náðu samkomulagi og viðurkenndi Hjörtur fulla ábyrgð.

Edda Sif ræðir opinberlega um árásina í fyrsta skipti í forsíðuviðtali Vikunnar. Hún segir frá líkamsárásinni, eftirmálum hennar og sjálfsvinnunni sem tók við í kjölfarið.

„Ég hef aldrei viljað tala um þetta opinberlega. Fyrst og síðast til að verja sjálfa mig, held ég, því ofbeldið var slæmt en umræðan reyndist mér jafnvel enn verri þó að það sé skrítið að segja það. Ég komst að því þegar ég byrjaði í EMDR-áfallameðferð fyrir einu og hálfu ári að augnablikið þegar ég hélt að ég myndi deyja var ekki það versta í þessu öllu saman heldur það sem á eftir kom; það sem fólk sagði eða sagði ekki. Fólk vissi ekkert hvað hafði gengið á en gaf sér að það vissi það, þetta var mikið í fjölmiðlum og rætt manna á milli þar sem ýmislegt var gefið í skyn en enginn fótur var fyrir,“ segir hún.

„Ég lét þetta yfir mig ganga án þess að segja mína hlið og hef gert síðan en það gengur kannski ekki upp að þegja bara og ætlast á sama tíma til að fólk viti og skilji. Og ég væri örugglega ekki að tala um þetta núna nema af því að það er fullt af fólki búið að stíga fram með sína reynslu og ég vona að tíðarandinn sé þess vegna aðeins annar en fyrir áratug.“ segir Edda Sif.

Hægt er að lesa viðtalið við Eddu Sif og nýjasta tölublað Vikunnar á áskriftarvef Birtíngs. Sjö daga fríáskrift er í boði fyrir nýja áskrifendur.