Roman Abramovich, rússneski olígarkinn sem á enska knattspyrnuliðið Chelsea, óttaðist um líf sitt eftir að eitrað var fyrir honum og samningamönnum Úkraínu sem funduðu með samningamönnum Rússlands um vopnahlé í stríðinu í Úkraínu.

The New York Times segir að húð hafi flagnað af andliti og höndum Abromvich og hann missti sjónina tímabundið. Sömu einkenni komu fram hjá þeim tveimur úkraínsku samningamönnum sem urðu einnig fyrir eitrun.

Vísindamaður á sjúkrahúsi í Istanbúl í Tyrklandi rannsakaði Abramovich eftir að einkennin komu fram en hann var fluttur flugleiðis þangað. Hann er sagður hafa spurt vísindamanninn: „Erum við að deyja?“

Mennirnir jöfnuðu sig á næstu vikum en ekki er talið að þeir beri varanlegt tjón af. Ekki er vitað hvað eitur var notað en böndin beinast að Rússum sem hafa einmitt verið iðnir við að eitra fyrir andstæðingum valdhafa í Kreml.