Sumir sérfræðingar segja nei en aðrir benda á finnska módelið svokallaða sem hugsanlega lausn. Finnar áttu í stríði tvisvar í stríði við Sovétríkin frá 1939 til 1944 og töpuðu. Samt sem áður fengu Finnar að halda sjálfstæði sínu og vera lýðræðisríki með vestrænt markaðshagkerfi eftir síðari heimsstyrjöldina.
Þetta fengu þeir gegn því að lofa að vera óháðir öðrum ríkjum og bandalögum, nema hvað þeir fengu að vera með í Norðurlandasamstarfinu, en þó aðallega gegn því að verða ekki aðilar að NATO og gegn því að sleppa því að vera með löggjöf og yfirlýsingar sem gætu talist andsovéskar. Sovétmenn fengu einnig að hafa ákveðin áhrif á finnsk innanríkismál.
Jótlandspósturinn hefur eftir Hans Mouritzen, sérfræðingi hjá Dansk Institut for Internationale Studier, að margir telji að eina leiðin fyrir Úkraínu út úr stríðinu sé einhverskonar „Finnlandsvæðing“ sem bæði Úkraínumenn og Rússar gætu lifað með. Til þess að þetta gæti gengið upp þyrfti að uppfylla ákveðin skilyrði, til dæmis að Rússar lofi að koma ekki 100.000 mann herliði fyrir við landamæri ríkjanna. Hann benti þó á að hugsanlega sé „Finnlandsvæðingarleiðin“ ekki lengur fær vegna þess sem hefur gerst í stríðinu fram að þessu þar sem Rússar hafa gengið fram af mikilli hörku og orðið mörg þúsund manns að bana og lagt stór svæði í rúst. „En Finnar fóru í gegnum tvö hræðileg stríð og tókst samt sem áður að koma ró á og halda áfram. Það er enginn vafi á að það er erfitt ferli sem krefst þess að fólk sé með stáltaugar eins og finnskir stjórnmálamenn voru með. Ég er þó ekki viss um að úkraínskir stjórnmálamenn séu með þennan hæfileika,“ sagði hann.
Einar Lie, hjá Oslóarháskóla, sagðist einnig sjá finnska módelið sem möguleika. Finnar hafi lifað við mikla spennu í samskiptunum við Sovétríkin og síðar Rússland og hafi fundið leið til að lifa náið með þessum stóra nágranna sínum. Finnar séu því vanir að glíma við stórveldi en það sé óvíst hvort Pútín muni sætta sig við leið af þessu tagi.
