Niels Bo Poulsen, hernaðarsérfræðingur, sagði í samtali við Jótlandspóstinn að þrjár ástæður væru fyrir að Rússar hafi ekki enn sigrað.
Sú fyrsta er Pútín sjálfur. Poulsen sagði að margt, sem hefur komið fram á undanförnum árum, bendi til að Pútín hafi einangrast sífellt meira frá umheiminum. Hann fái upplýsingar frá frekar litlum hópi og ráðfæri sig ekki nægilega mikið við breiðan hóp ráðgjafa. Til dæmis líti út fyrir að hvorki efnahagsráðuneytið né seðlabankinn hafi vitað um fyrirhugaða innrás því annars hefði verið gripið til ráðstafana til að flytja peninga á milli staða. Hann benti á að á þeim áratugum sem Pútín hefur verið við völd hafi þeim fækkað sem hann umgengst og það sé nú aðallega fólk sem veit hvað hann vill heyra og segi einmitt það. Það geri að verkum að hann sé hugsanlega ekki í tengslum við raunveruleikann.
Önnur ástæða er rússneska kerfið. Poulsen sagði að þau vandamál sem rússnesku hersveitirnar glíma nú við líkist ótrúlega vandamálum þýska hersins í báðum heimsstyrjöldunum. Þá háðu þýskur hersveitirnar harðar orustur en æðstu menn ríkisins, keisarinn og síðar Hitler, fengu ekki góða ráðgjöf varðandi notkun diplómatískra leiða eða hvaða áhrif stríðið hefði á efnahagslífið. Þannig hafa snaran sífellt þrengst að hálsi þeirra á efnahagssviðinu og það sé svipuð mynd og sést nú í Rússlandi. Hann sagðist telja að eitt af stærstu vandamálum Rússlands síðustu 150 árin sé að ekki hafi tekist að finna leiðir til að almenningur og fólk með fjárhagsvit taki þátt í rekstri hins opinbera.
Spilling er síðan þriðja ástæðan. Poulsen sagði að ef þær upplýsingar sem hafa komið fram um vafasöm gæði útbúnaðar rússneska hersins séu réttar þá bendi það til að hin landlæga spilling í Rússlandi hafi einnig áhrif á stríðsreksturinn. „Þetta hefur alltaf verið vandamál í Rússlandi. Þú færð fjárveitingu og stingur hluta af henni í eiginn vasa og kaupir síðan ódýrari útbúnað en átti að gera. Pútín fær svo að vita að toppútbúnaður hafi verið keyptur,“ sagði hann.
