Frá því að COVID-19 kom fram á sjónarsviðið og þar til bóluefni gegn veirunni var tilbúið liðu um 300 dagar að sögn Dame Sarah Gilbert sem vann að gerð bóluefnis AstraZeneca. Hún segir að þegar næsti heimsfaraldur, svokallaður Sjúkdómur X, skelli á heimsbyggðinni verði bóluefni að vera tilbúið á aðeins 100 dögum.

Gilbert lét þessi orð falla í viðtali við Sky News. Hún sagði að til þess að koma í veg fyrir hörmulegar afleiðingar næsta heimsfaraldurs verði viðbrögðin að vera betri.

Hún sagði að heimsbyggðin þurfi að vera betur undirbúin undir faraldur svo ekki þurfi að byrja á upphafsreit.

Ef tekist hefði að þróa bóluefni gegn COVID-19 á 100 dögum hefði bjargað milljónum mannslífa og gríðarlegum fjárhæðum.

Gilbert sagði að koma þurfi upp einhverskonar „bókasafni“ bóluefna gegn þeim veirutegundum sem mest hætta stafar af. Það þýði að í upphafi verði 10 bóluefni, með breiða virkni, til reiðu. Út frá þeim sé síðan hægt að þróa bóluefni gegn ákveðnum veirum.