Rússneskur almenningur er farinn að finna fyrir refsiaðgerðum Vesturlanda gegn Rússlandi vegna innrásarinnar í Úkraínu. Þær koma illa við veski margra og gera líf almennings enn erfiðara. Auk þess er almenningur einangraður frá umheiminum að miklu leyti því gripið hefur verið til strangrar ritskoðunar í landinu. En á sama tíma hafa Pútín og hans fólk það gott enda með nóg af peningum til umráða eftir að hafa arðrænt rússnesku þjóðina áratugum saman og sankað að sér miklum auði.

Pútín er sagður hafa komið ástkonu sinni, Alina Kabaeva, og fjórum börnum hennar í öruggt skjól í Sviss. Kabaeva er 38 ára og fyrrum gullverðlaunahafi á Vetrarólympíuleikum.

Mirror og Page Six skýra frá þessu. Miðlarnir segja að Pútín sé faðir barnanna en það hefur aldrei verið staðfest því Pútín gætir vel að einkalífi sínu og lætur lítið uppi um það.

„Á meðan Pútín ræðst á Úkraínu, saklausa borgara og veldur flóttamannavanda, er fjölskylda hans á afskekktum og mjög öruggum stað í Sviss, að minnsta kosti ennþá,“ hefur Page Six eftir ónafngreindum heimildarmanni.

Að Sviss hafi orðið fyrir valinu sem felustaður fjölskyldunnar þarf ekki að koma á óvart því börn Kabaeva eru öll fædd þar og eru svissneskir ríkisborgarar. Talið er að Kabaeva sé það einnig. Þau geta því auðveldlega „falist“ í landinu.