Fyrst var skýrt frá málinu í New England Journal of Medicine í mars 2020. Þá kom fram að maðurinn hafi verið lagður inn á Massachusetts General Hospital því hann var í „sjokki, með bletti á húðinni, mörg líffæri störfuðu ekki eðlilega og útbrot dreifðust hratt um líkamann“.
„Sjúklingnum leið vel þar til 20 klukkustundum áður en hann var lagður inn. Þá byrjuðu margvíslegir magaverkir og ógleði að gera vart við sig eftir að hann borðaði afganga af hrísgrjónum, kjúklingi og lo mein frá veitingastað,“ kom fram í greininni í vísindaritinu. Síðan var versnandi ástandi hans lýst, þar á meðal uppköstum, vöðvaverkjum, andnauð, höfuðverk og versnandi sjón svo eitthvað sé nefnt.
Hann mældist með 40,5 gráðu hita og hjartað sló 166 slög á mínútu. Blóðsýni voru tekin til rannsókna og sýndu að hann var með Neisseria heilahimnubólgu sem gerði að verkum að blóð hans storknaði og lifrin hætti að starfa eðlilega.
Maðurinn hafði aðeins fengið einn af þremur ráðlögðum skömmtum af heilahimnubólgubóluefni. Læknar neyddust til að taka báða fótleggi af honum og alla fingurna. Hann náði sér nokkuð hratt eftir það.
Eiturefnafræðingurinn Bernard Hsu fjallaði nýlega um málið í myndbandi á YouTube og sagði meðal annars að hér hafi verið um samspil ótrúlegrar óheppni að ræða.
New York Post segir að vinir mannsins hafi borðað af sömu afgöngum en aðeins hann hafi veikst.
